• Follow Us:
  • Shia Download
  • Shia Download
  • Shia Download
  • Shia Download

Jab Khatema Ba Khair Huwa Fauj E Shaam Ka Marsiya Writeup, Lyrics

Jab Khatema Ba Khair Huwa Fauj E Shaam Ka
Kousar Pa Qaafila Gaya Pyaasi Sipaah Ka
Ghar Lutgaya Janaab-E Risalath Panaah Ka
Khaak Udh Rahi Thi, Haai Ye Tha Baargaah Ka
        Bhaai The, Na Rafeeq, Na Wo Noor-E Ain The
        Do Behney Rone Waali Thi Aur Ek Hussain The

Farmaathe The Ke Waah Ye Taqdeer Hai Ajal
Akbar Ke Baad Kounsa Tha Zeest Ka Mahal
Ab Mujhko Ek Bars Ke Barabar Hai Aik Pal
Mouth Aaye Ab Ye Hai Shajar-E Zindagi Ka Phal
        Ek Jaa Churi Gale Pa Jo Chalthi Tho Qhoob Tha
        Ye Jaan Unke Saath Nikalthi Tho Khoob Tha

Ham Sab Ke Baad Qalq Se Jeene Ko Rah Gaye
Sar Peetne Ko Ashk Bahaane Ko Rah Gaye
Us Noujawaan Ka Daagh Uthaane Ko Rah Gaye
Peeri Me Aah Thok-Rey Khaane Ko Rah Gaye
        Beta Kahan Qabar Jo Dam-E Inteqaal Le
        Itna Nahi Koi Ke Giroon, Tho Sambhaal Le

Naagaah Soo-E Laash-E Pisar Jaa Padi Nazar
Chilaa-E Dil Ko Thaam Ke Sultaan-E Bahro Bar
Sothe Ho Kya Dhare Huwe Ruqsaar Qhaak Par
Akbar Utho Ke Ghoude Se Girtha Hai Ab Pidar
        Bhoole Pidar Ko Neend Me Qurbaan Aap Ke
        Aao Namaaz-E Asr Padho Saath Baap Ke

Abbas-E Namdaar Taraai Se Uth Ke Aao
Phat- Tha Hai Qhalb, Jal Rahe Hai Sab Jigar Ke Ghaao
Chidko Meri Ziraa Pa Jo Paani Kahin Se Paao
Chalthe Huwe Adam Ke Musafir Se Milthe Jaao
        Ghaflath Ki Tum Ko Need Hai Shabbir Kya Kare
        Meri Tarha Kisi Ko Na Bekas Quda Kare

Chillaya Fouj Ke Pisar-E Saad-E Naabakaar
Lo Ghair Lo Hussain Ko Sab Milke Aik Baar
Palte Pare Sawaaroun Ke Lekar Risaaladaar
Do Ghowl Baandhe Aaye Kamaandar Das Hazaar
        Teer Afghanoun Me, Teghown Me, Bhaloun Me Ghir Gaye
        Bekas Hussain Barchiyoun Waloun Me Ghir Gaye

Syed Ke Martabe Ko Na Jaana Hazaar Haif
Teeroun Se Sadr-E Paak Ko Chaana Hazaar Haif
Shaane The Naawakoun Ka Nishana Hazaar Haif
Mazloom Ka Wo Barchiyaan Khana Hazaar Haif
        Toote The Sab Rasool Ke Pyaare Hussain Par
        Kya Waqt Padh Gaya Tha Tumhaare Hussain Par

Girthe Hain Aap Aur Sambhaale Koi Nahi
Seene Se Koun Teer Nikaale Koi Nahi
Sab Mar Chuke Hain Chaahne Waale Koi Nahi
Bejaa Pade Hain Godh Ke Paale Koi Nahi
        Bedas Hain Aap Zour Sipaah-E Adoo Ka Hai
        Mu Jis Ka Dekhthe Hain Wo Pyaasa Lahoo Ka Hai

Fizza Ne Jaake Qaime Me Bewoun Ko Di Qabar
Hae Hae Mere Quzaade Ka Kat-Tha Hai Tan Se Sar
Bistar Se Uth Ke Girpade Sajjad-E- Nouhagar
Qaime Se Nikli Bibiyaan Bachoun Ko Cho-Ddh Kar
        Hilta Tha Arsh Hazrath-E Zainab Ke Bain Se
        Gir Gir Ke Doudhthi Thi Milne Hussain Se

Chillathi Thi Are Mera Bhaai Hai Kistaraf
Looti Huwi Ali Ki Kamaai Hai Kis Taraf
Darya Kidhar Hai Khoon Ka Taraai Hai Kistaraf
Soney Ki Jaah Hussain Ne Paai Hai Kistaraf
        Rastha De Aye Zameen Ke Falak Ki Sathaai Hoon
        Mai Apne Pyaare Bhaai Se Milne Ko Aai Hoon

Mai Syeda Hoon Raham Karo Laash Ko Bataao
Aye Ahl-E Qirya Bint-E Ali Ki Madad Ko Aao
Duna Me Khush Tum Raho Uqba Me Chain Paao
Syed Kidhar Hai Khoon Me Ghaltaan Bataae Jaao
        Yaan Lut Gaye Falak Ne Ye Dukh Ham Pa Daale Hain
        Aye Bhaaiyo Madine Ke Ham Rahne Waale Hain

Shah Ke Karaahne Ki Jo Aane Lagi Sadaa
Dowdhi Udhar Nabi Ki Nawaasi Barahna Paa
Dekha Bahan Ne Kat- The Huwe Bhaai Ka Gala
Aankhoun Pa Haath Rakh Ke Giri Bint-E Murtuza
        Gham Se Kaleja Phat Gaya Zehra Ki Jaai Ka
        Utthi Tho Dekha Neza Pesar Apne Bhaai Ka